Banorët e Shipitullës dhe Hades, ultimatum Qeverisë

23:45 / E enjte, 14 Qershor 2018

Ka më shumë se 9 muaj që Qeveria e Kosovës ka marrë vendimin për shpronësimin e tokave në fshatin Hade dhe Shipitullë të Obilqit.

Marrëveshja e banorëve me Haradinajn, parashihte edhe punësimin e të rinjve të kësaj ane në minierat e Korporatës Energjetike të Kosovës (KEK).

Pasi punësimi i banorëve ende nuk ka nisur, ata kanë bërë veprime të reja, që mund t’i kushtojnë më shumë para buxhetit të shtetit.

Ata kanë hapur numër të madh të bunarëve, e krejt këtë po thonë se po e bëjnë pasi gjithmonë kanë punuar tokat e tyre.

Përfaqësuesi i këtyre banorëve, Azem Mjeku deklaroi për RTV Dukagjinin se ndaj tyre u bënë shumë padrejtësi.

“Asnjërit prej këtyre banorëve që u kanë marrë tokat, nuk janë punësuar. Ka pasur disa me shkolla të larta apo inxhinierë që janë punësuar, diku rreth njëzetë, por nga ky vend asnjë”, tha Azem Mjeku.

Nga ana tjetër, zëvendësministri i Mjedisit dhe Planifikimit Hapsinor, Fatmir Matoshi, tha se asnjë investim i këtyre banorëve i kryer pas nënshkrimit të marrëveshjes nuk do të kompensohet.

“Banorët e fshatrave Hade dhe Shipitullë kanë një marrëveshje me Qeverinë e Kosovës dhe ajo do të mbetet në fuqi. Të gjitha investimet që janë bërë nga banorët në këto toka nuk do të rrisin aspak vlerën e tokës sado që mund të jenë të kushtueshme”, thuhet në përgjigjen e zëvendësministrit Matoshi.

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400