Klinika e Kardiologjisë furnizohet me 25 stenta, brenda 10 ditësh arrijnë edhe 140

18:45 / E enjte, 14 Qershor 2018

Në Qendrën Klinike Universitare të Kosovës një numër i konsiderueshëm i pacientëve janë duke pritur për intervenime në zemër. Madje deri para disa muajve lista e pritjes së tyre për stentime dhe koronarografi ka zgjatur deri në një vit. Por, siç duket, pritjet e pacientëve që kanë pësuar infarkt e që kanë nevojë për stentа tash e tutje nuk do të jenë të gjata. Kjo ngase Kardiokirurgjia dhe Kardiologjia Invazive kanë nisur trajtimin e infarktit dhe stentimin emergjent 24 orë në ditë, në shtatë ditë të javës.

Rreth 350 kosovarë janë të evidentuar në listat e pritjes së QKUK’së për intervenim me stentë në zemër. Kjo listë është më e vogël nga ajo që ka qenë gjatë fillimit të këtij viti, transmeton Gazeta InfoPress.

Kështu i ka thënë Express’it, ushtruesi i detyrës së drejtorit të Klinikës së Kardiokirurgjisë dhe Kardiologjisë Invazive në QKUK, dr. Tefik Bekteshi.

Ai ka sqaruar se lista e pritjes për stentime dhe koronarografi brenda pak muajve do të zhduket plotësisht dhe pacientët më nuk do të presin në radhë për kryerjen e këtyre shërbimeve.

“Listë të pritjes kemi, është shumë më e vogël se përpara. Nga mbi 1 mijë, tani veç e kemi ulur në më pak se 350 persona. Shpresojmë se shumë shpejt edhe këtë numër do ta zbusim deri sa ta caktojmë koronarografinë atëherë kur duhet dhe që të mos kemi listë të pritjes. Për tre-katër muaj besojmë që për koronarografi më nuk do të kemi listë të pritjes”, thotë Bekteshi.

Por, puna për vendosjen e stentave në zemër nuk po zhvillohet normalisht në klinikën e Kardiokirurgjisë. Aty, sipas zyrtarëve shëndetësorë, kanë filluar që të vërehen mungesat e stentave.

“Momentalisht e kemi ndalur stentimin elektiv, domethënë të seleksionuar, për shkak se nuk kemi kontingjent të mjaftueshëm të stentave për infarkt akut. Shumë shpejt presim që të furnizohemi. Ne e kemi kontingjentin bazik, por ne presim që brenda një kohe shumë të shkurtër që të furnizohemi plotësisht dhe të vazhdojmë me krejt kapacitetin”, thotë Bekteshi.

Sipas tij, janë rreth 50 pacientë të cilët për momentin janë raste më emergjente për këtë lloj stentimi.

“Janë diku rreth 50 pacientë që janë duke pritur për stentim. Ata duhet të presin se thjesht nuk mund të rrezikojmë që të presin rastet akute në pamundësi për intervenim.Tenderi për këtë punë ka kaluar dhe shpresoj që shumë shpejt do të kemi furnizim adekuat”, ka sqaruar për Express dr. Bekteshi.

Rreth kësaj problematike nga Ministria e Shëndetësisë kanë sqaruar se gjatë ditës së djeshme (e mërkurë), në Kardiologji Invazive ka shkuar kontingjenti i parë me 25 stenta, ndërsa brenda 10 ditësh pritet të arrijnë edhe 140 të tjera.

“Brenda këtij muajit do të vijë edhe një kontingjent tjetër prej 160 stentave të tjera, varësisht nevojave dhe dimensioneve të kërkuara, sepse janë nënshkruar edhe urdhër-blerjet, ashtu që operatorët t’i kryejnë furnizimet e nevojshme”, kanë sqaruar nga Ministria e Shëndetësisë.

Sipas MSH-së, të gjitha këto furnizime janë në kuadër të kontratës të nënshkruar e cila parasheh furnizimin me 2 mijë stenta të QKUK-së, sipas porosive dhe nevojave të spitalit shtetëror.

Nga dikastreri qeveritar përgjegjës për shëndetësinë deklarojnë se më nuk do të ketë vonesa për stenta.

“Tash e tutje, nuk do të ketë më vonesa në furnizime me stenta, edhe për shkak të futjes në funksion të sistemit të ri për menaxhimin e kontratave për barna dhe material shpenzues, i cili do të sinjalizojë 4 muaj më herët për skadimin e kontratës, duke dhënë mundësinë për zhvillim me kohë të procedurave për kontratat e reja”, thuhet në përgjigjen e Ministrisë së Shëndetësisë.

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400