Negociatat, Bushati: Opozita kërkon të vetëpërjashtohet

18:33 / E hëne, 11 Qershor 2018

Ministri i Jashtëm i Shqipërisë, Ditmir Bushati, ka deklaruar se opozita po kërkon të vetëpërjashtohet nga procesi i hapjes së negociatave.

“E para, na duhet ta themi që vendimmarrja e BE-së nuk është vendimmarrje as për qeverinë shqiptare, as për Edi Ramën. Është për të ardhur keq që opozita shqiptare ka vendosur një bast, ka një ton ultimativ a thua se më 28 do të marrë fund çdo gjë dhe më 29 nuk do të lindë sërish dielli në Shqipëri”.

“Ne mendojmë se ky është një proces që prek të gjithë shqiptarët. Është për të ardhur keq që opozita me sjelljen e saj kërkon të vetëpërjashtohet, qoftë dhe nga vetë kontributi që forcat politike kanë në këtë proces”.

Ai në një bashkëbisedim me studentët ka kërkuar që opozita të jetë më konstruktive në procese të rëndësishme për vendin, shkruan Top Channel.

“Ne besojmë fuqimisht që në fund të këtij muaji, Këshilli i BE-së do t’i hapë një perspektivë të qartë Shqipërisë përsa i përket këtij procesi i cili e ritheksoj nuk do të jetë një proces i lehtë, nuk do të shoqërohet vetëm me të drejta por do të shoqërohet dhe me detyrime”.

“Në këtë kontekst, unë dua të besoj dhe të shpresoj që opozita shqiptare do të duhet të jetë më konstruktive, jo për të fshirë dallimet politike mes nesh, dhe pluralizmin politik, ruajna Zot, po për t’u bërë pjesë e atyre proceseve që konsiderohen si procese që kanë të bëjë me shtetkonsolidimin. Sa më shpejt ta kuptojmë ne këtë gjë si klasë politike, aq më e mirë do të jetë kjo për të gjithë qytetarët e zakonshëm të këtij vendi”.

Duke folur para studentëve dhe për përfitimet e të rinjve përsa i përket arsimit dhe edukimit, Ministri i Jashtëm tha se hapja e negociatave shton mundësitë dhe instrumentet që janë në dispozicion të institucioneve shqiptare, bizneseve e qytetarëve dhe ky është investimi më i mirë për gjeneratën e re.

“Besoj se ky është investimi më i mirë që ne mund të bëjmë për gjeneratën e re, sikundër unë shpresoj dhe nxis që ju të jeni sa më aktivë dhe kërkues ndaj nesh e ndaj çdo aktori publik që ka një zë në jetën publike për ta trajtuar sidomos këtë çështje me përgjegjësinë që i takon”.

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400