Rasti ‘Harausham’ rikthehet sot në Gjykatë

09:25 / E mërkure, 15 Nëntor 2017

 

Arben Livoreka dhe Nexhat Behluli, të akuzuar për pjesëmarrje në grup terrorist, do të dalin përsëri para Gjykatës gjatë ditës së sotme për t’u përballur me aktakuzën.

Në një rast që në media u bë i njohur si rasti “Harausham”, për shkak të gabimit të Prokurorisë që në aktakuzë kishin pretendime se të akuzuarit i ishin bashkuar një organizate për të cilin BIRN zbuloi se në fakt nuk ekzistonte, Arben Livoreka dhe Nexhat Behluli do të ballafaqohen me akuzat që rëndojnë kundër tyre.

Termi “Harausham”, që i referohet një organizate joekzistuese terroriste, është larguar nga një aktakuzë.

Gati katër vjet i janë dashur Prokurorisë Speciale të Kosovës që të përmirësojë gabimin në aktakuzën që i ngarkon dy persona për pjesëmarrje në luftën e Sirisë.

Një aktakuzë e Prokurorisë Speciale të Kosovës akuzon Arben Livorekën dhe Nexhat Behlulin se kanë marrë pjesë në luftën e Sirisë përkrah organizatave terroriste.

Behluli dhe Livoreka kishin pranuar fajësinë dhe ishin dënuar me nga 3 vjet e 6 muaj burg, ndërsa kishin tërhequr pranimin e fajësisë në Gjykatën e Apelit, gjykatë kjo që e riktheu në rigjykim këtë rast, pasi evidentoi një varg shkeljesh.

Media kishte raportuar se organizata terroriste për të cilën prokuroria pretendonte se quhet “Harausham”, në fakt nuk ekzistonte.

Duke u interesuar lidhur me ekzistencën e kësaj organizate KALLXO.com dërgoi pyetje në disa institucione relevante për të ditur më shumë për organizatën “Harausham”, por u përball me heshtjen e këtyre institucioneve.

Në seancën e mbajtur në Gjykatën Themelore të Prishtinës, më 13 korrik të këtij viti, prokurori i ri i kësaj çështje, Elez Blakaj, precizoi aktakuzën.

“Në çdo vend në aktakuzë ku është e shkruar ‘Harausham”, kërkojmë që të përmirësohet në ‘Ahrahal Sham’”, kishte precizuar Blakaj.

Blakaj e arsyetoi këtë propozim me faktin se emri “Harausham”, është përkthyer nga anglishtja nga lista e organizatave terroriste.

Sipas aktakuzës së paprecizuar të Prokurorisë Speciale të Kosovës, Arben Livoreka më 28 nëntor të vitit 2013 nga Aeroporti “Adem Jashari” udhëtoi për në Stamboll dhe më pas kaloi në Siri ku u bashkua me grupin “Harausham” që ka vepruar në kuadër të Al-Nusras, ku ka qëndruar për dy muaj e gjysmë.

Ai ishte kthyer në Kosovë menjëherë pasi kishte plasur konflikti meqë ISIS kishte dashur të marrë nën komandën e tyre këtë organizatë.

Edhe i akuzuari tjetër, Nexhat Behluli, sipas aktakuzës më 9 mars 2013 i është bashkangjitur organizatës Al-Nusra por pasi kanë lindur konfliktet mes tyre është kthyer në Kosovë me 30 mars të atij viti.

Të gjitha të drejtat janë të rezervuara © 2017 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400