Vetëvendosje shpërfill Shpend Ahmetin, vendos billborde pa e pyetur Komunën e Prishtinës

21:28 / E diell, 18 Shkurt 2018

 

 

Mbrëmjen e së dielës, ditë vikendi e feste, në disa billborda nëpër kryeqytet janë vendosur posterë me katër aktivistët e Vetëvendosjes të cilët janë dënuar në shkallën e parë si të dyshuar për sulm me granatë ndaj Kuvendit të Kosovës.

Billbordat kërkojnë drejtësi për pesë aktivistët, të cilët më 22 shkurt do të dalin para panelit të Gjykatës së Apelit.

Por billbordi është ngjitur keq. Vetëvendosje pranon se i ka ngjitur vetë ata, pa marrë leje nga Komuna. Madje nuk ka paguar as kompaninë që menaxhon me hapësirat reklamuese nëpër billborda në kryeqytet.

Tinka Kurti, nga Zyra për Media e Lëvizjes Vetëvendosje ka thënë për KTV-në se ata i kanë ngjitur këta posterë.

“Ne kemi planifikuar që të marrim leje për billbordin, por Komuna e Prishtinës në përgjigjen ndaj kërkesës sonë na ka njoftuar se hapësirat e tilla reklamuese nuk i ka në shfrytëzim për shkak të skadimit të kontratës të kompanisë së cilës i është besuar më parë kjo. Për shkak të datës 22 shkurt, kur do të mbahet seanca e Gjykatës së Apelit për aktivistët tanë, ne nuk kemi mundur që këtë aktivitet ta shtyjmë në kohë”, ka thënë Kurti.

“Lokacioni ku është vendosur billbordi nëpërmjet të cilit kërkojmë liri për aktivistët, është afër Universitetit të Prishtinës, Ministrisë së Arsimit dhe Akademisë së Shkencave. Ata janë aktivistë, studentë dhe qytetarë të pafajshëm të kësaj republike. Seanca më 22 shkurt duhet të jetë dita e rregullimit të padrejtësisë”, ka thënë Kurti.

Portali ka kontaktuar me Kushtrim Krasniqin, menaxher i operacioneve në AMM, e cila menaxhon me hapësirat reklamuese nëpër billborda në kryeqytet. Ai ka thënë se nuk kanë kurrfarë njohurie për vendosjen e këtyre posterëve.

“Këtë e kanë bërë pa kurrfarë kërkese nga ana e tyre. Objektet e billbordëve janë pronë e AMM-së dhe si të tillë ka qenë dashtë që paraprakisht të bëhet kërkesë për shfrytëzimin e hapësirave, ani pse jemi në kontest pronësor me Komunën e Prishtinës që ka shkëputur njëanshëm kontratën me ne”, ka thënë Krasniqi.

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400