Zyra e Gjuriqit i reagon Veselit pas intervistës në T7: Ti je shtetas serb

12:18 / E enjte, 22 Mars 2018

Intervista e mbrëmshme e kryeparlamentarit Kadri Veseli në Televizionin T7 ka shkaktuar një reagim nervoz të së ashtuquajturës “Zyrë për Kosovën e Metohinë” të Qeverisë serbe.

Zyra e Marko Gjuriqit e ka porositur Veselin se Presheva Medvegja dhe Nishi kurrë s’do të jenë territore kosovare, porse Prishtina është dhe do të mbetet pjesë e Serbisë.

“Kadri Veseli të mos gëzohet (“Neka se Kadri Veselji ne veseli”, thuhet në origjinal) sepse Kosova e Metohija kurrë s’do të jetë shtet, e as Presheva, Medvegja apo Nishi ndonjëherë do të jenë pjesë e të ashtuquajturës Republika e Kosovës, por Prishtina është dhe do të mbetet pjesë e Serbisë, ndërsa ai do të jetë shtetas serb”, thuhet në reagimin e kësaj zyre qeveritare serbe.

Veseli për TV T7 tha se nuk ka mundësi për ndryshim të kufijve, porse nuk ka asgjë kundër sikur Serbia t’ia jepte Kosovës Preshevën, Medvegjen dhe komuna tjera të Serbisë jugore. Ndërkaq, theksoi spikeri i Parlamentit kosovar, “shteti ynë s’ka çka t’i japë Serbisë.

“Kadri Veseli, përndryshe i njohur për atë që i pëlqen të kërcënohet me luftë dhe me rrëmbim territoresh, duhet ta dijë se s’është punë e mençur të kërcënohesh me dhunë, sidomos jo ndaj më të fortit se vetja”, thuhet në komunikatë.

Gjithashtu, siç transmeton Expressi, zyra e Gjuriqit porosit se “ka ardhur koha e dialogut, në të cilën problemet nuk zgjidhen me sulme të ulëta, gjë që ai si komandant i dikurshëm i UÇK-së terroriste nuk e ka lehtë ta kuptojë, por do të ketë kohë edhe për ballafaqim me realitetin.

 

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400