Koreja shemb tunelet bërthamore në prani të gazetarëve të huaj

15:22 / E enjte, 24 Maj 2018

Në një tjetër lëvizje që synon tkurrjen e tensioneve rajonale, Koreja e Veriut hodhi në erë tunelet e kompleksit të vetëm të saj të testesve bërthamore. Gazetarët e huaj, të ftuar në Punggye-ri, u kthyen në dëshmitarë të një shpërthimi gjigant.

Peniani ishte ofruar në fillim të vitit të niste çmontimin e zonës, si pjesë e përpjekjeve për afrim diplomatik me Korenë e Jugut dhe Shtetet e Bashkuara.

Shkencëtarët, megjithatë, besojnë se kompleksi ishte shembur pjesërisht pas testit të fundit shtatorin e vitit 2017, i cili sipas tyre e kishte bërë këtë vend praktikisht të papërdorshëm.

Lëvizja, që shihet për çdo rast si një tjetër sinjal zbutjeje i regjimit komunist, vjen pak pas deklaratave fshikulluese me në fokus numrin dy të administratës amerikane, të cilat hodhën hije të tjera dyshimi mbi takimin e shumëpërfolur historik të Donald Trumpit me Kim Jong-unin.

Zëvendësministrja e Jashtme e vendit komunist e akuzoi Mike Pence për “doza budallallëku” dhe paralajmëroi mbi mundësinë e një “përplasjeje bërthamore” nëse diplomacia dështon.

“Peniani nuk do t’i lutet Uashingtonit për dialog, – tha Choe Son-hui. – E as nuk do të përpiqet ta bindë palën tjetër të marrë pjesë në bisedime”.

Në një artikull të agjencisë shtetërore të lajmeve “KCNA”, ajo citohet të pohojë se Pence ka bërë në media disa komente të pahijshme, që nuk mund të anashkalohen, duke përfshirë këtu pretendimet se Koreja e Veriut mund të përfundojë si Libia.

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400