Portugali e Spanjë, zjarret shkaktojnë viktima e dëme

01:48 / E martë, 17 Tetor 2017

 

Zjarret masive në qendër dhe veri të Portugalisë që nisën në fundjavë i kanë kushtuar jetën të paktën 31 personave.

Dhjetëra nga 145 zjarret që janë ende ndezur konsiderohen serioze. Sipas autoriteteve lokale, zjarret në veri erdhën nga kufiri me Spanjën, nga krahina e Galicias ku kanë humbur jetën tre persona.

Mijëra zjarrfikës dhe mjete në të dyja anët e kufirit janë angazhuar në betejën me vatrat e zjarrit që pasuan verën e nxehtë dhe të thatë.

Dëmet materiale janë të konsiderueshme në të dyja vendet, ku zjarret kanë djegur shumë banesa dhe ndërtesa të tjera që ishin në rrugën e tyre. Kushtet në terren janë përkeqësuar nga uragani “Ofelia”, ndërsa ai i afrohet brigjeve perëndimore të Europës duke sjellë erëra të forta që nxisin përhapjen e flakëve.

Në Portugali, situata është mjaft serioze, ku rreth 50 persona kanë mbetur të plagosur, disa prej të cilëve në gjendje të rëndë. Në Spanjë gjendja është më e përballueshme, por sidoqoftë kryeministri spanjoll Mariano Rahoy udhëtoi vetë drejt krahinës së Galicias, ku autoritetet thonë se zjarret janë vënë me dashje. Policia lokale i ka cilësuar zjarret në Spanjë si akt terrorist dhe kryeministri Rahoi u zotua se përgjegjësit do të dalin para drejtësisë.

Të gjitha të drejtat janë të rezervuara © 2017 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400