Rusia: Perëndimi fabrikoi prova për sulmet kimike në Siri

15:56 / E premte, 22 Qershor 2018

Moska tha se Shtetet e Bashkuara dhe aleatët e tyre kanë fabrikuar prova për të implikuar forcat e Qeverisë siriane në sulmet me armë kimike kundër civilëve.

Zyrtari i Ministrisë ruse të Mbrojtjes, Igor Kirillov, komandant i forcave të rrezatimit, kimike dhe biologjike, tha se sulmi i dyshuar kimik në qytetin Khan Sheikhon, më 4 prill, ka qenë “provokim i organizuar nga grupi sirian i ndihmës Helmetat e Bardha dhe sponsorët e tyre”.

Qeveritë perëndimore dhe inspektorët e Kombeve të Bashkuara kanë fajësuar forcat e Qeverisë siriane për këtë sulm, i cili ka lënë së paku 74 njerëz të vrarë dhe mbi 550 të plagosur.

Zëdhënësja e Ministrisë së Jashtme ruse, Maria Zakharova, tha se Qeveria siriane ka gjetur pajisje për prodhimin e armëve kimike në qytetin e Dumës, pasi ky i fundit ka rënë nën kontrollin e luftëtarëve antiqeveritarë.

“Një pjesë e pajisjes, e cila ishte profesionale nga pikëpamja e ekspertëve, fatkeqësisht është prodhuar në vendet e Evropës Perëndimore”, tha Zakharova, duke shtuar se Moska është e gatshme të ofrojë dëshmi të këtij pretendimi.

Komentet vijnë para se Kombet e Bashkuara të dalin me një raport për një sulm të dyshuar kimik që ka ndodhur muaj më parë në qytetin Duma.

 

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400