Trump pengon publikimin e komunikatës ku senatori McCain cilësohet hero

19:31 / E hëne, 27 Gusht 2018

Edhe pas vdekjes, presidenti amerikan Donald Trump vijon grindjen e tij me senatorin John McCain. Ai nuk ka lejuar publikimin e një komunikate të Shtëpisë së Bardhë, në të cilën McCain cilësohet hero lufte.

Presidenti amerikan Donald Trump ka penguar administratën e Shtëpisë së Bardhë në publikimin e një kumtese zyrtare me rastin e vdekjes të senatorit republikan John McCain.

Duke cituar zyrtarë të paemëruar të Shtëpisë së Bardhë, mediat amerikane raportojnë se zëdhënësja Sarah Sanders dhe shefi i kabinetit të Trumpit, John Kelly me rastin e ndarjes nga jeta të senatorit McCain lëshuan një njoftim zyrtar të Shtëpisë së Bardhë në të cilën flitet në superlativ për senatorin tashmë të ndjerë McCain duke e cilësuar si hero amerikan.

Të njëjtat burime raportojnë se presidenti amerikan Trump nuk ka miratuar publikimin e këtij teksti.

McCain ishte një nga kritikët më të zëshëm të politikave të Trumpit brenda qarqeve republikane, ndërsa Trump me rastin e vdekjes së tij u mjaftua me një mesazh ngushëllues që ia dërgoi familjes McCain përmes Twitterit.

Trump tre vite më parë publikisht kontestoi epitetin e McCain si hero nga lufta e Vitenamit.

“Ai nuk është hero lufte. Njihet si hero pasi ishte kapur si rob, ndërsa unë i dua ata që nuk janë kapur robër”, pati thënë Trump në një prononcim në vitin 2015.

Nga ana tjetër, zyra e senatorit të ndjerë McCain ka njoftuar se lamtumira e fundit do t’i jepet në një ceremoni që do të mbahet më 2 shtator në varrezat e Akademisë Detare në Maryland. Ndërkohë në Arizona dhe në Washington do të mbahen akademi komemorative.

 

Të gjitha të drejtat janë të rezervuara © 2018 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400