Pep Guardiola pretendon se e ka ditur që Manchester City do të kurorëzohej kampion i Premier League qysh kur ka mundur Chelsea, në shtator. Trajneri katalanas e pa skuadrën e tij të deklarojë synimet e veta mjaft herët në sezonin 2017-2018, me një barazim 1-1 në shtëpi ndaj Evertonit, në gusht, i pasuar nga 20 fitore në të gjitha garat.

Kjo ecuri i çoi “qytetarët” në vendin e parë të kampionatit anglez, duke bërë, gjithashtu, përparim pozitiv në “Carabao Cup” dhe në Ligën e Kampionëve. Dy prej këtyre trofeve tani janë siguruar, me Guardiolën që zbulon se e dinte se suksesi ishte në dorën e të tijve, pasi morën një fitore të ngushtë 1-0 ndaj kampionëve të Premier League, më 30 shtator.

Ai tha: “Mendoj se fitorja në “Stamford Bridge” na dha besimin se ne mund ta fitojmë titullin. Kjo, për shkak se sezonin e kaluar, kundër konkurrentëve të tjerë, nuk ishim aq të mirë. Këtë sezon, në përgjithësi, ishim mjaft të qëndrueshëm. Dhe Sergio Aguero është një gjeni, një lojtar i nivelit të lartë, edhe pse rreth 30 vjeç.

Lojtarët e tjerë janë 20, 21 vjeç, kështu që ne fituam me djem kaq të rinj. Duke luajtur në Ligën e Kampionëve në atë moshë, ndonjëherë është e komplikuar. Por, ndoshta do të jetë një mësim për sezonin e ardhshëm. Tani duhet të përpiqemi të bëhemi më të mirë. Nëse lexoni atë që njerëzit thonë këtë javë, ne duhet të përmirësojmë disa gjëra.

Por, ju nuk mund ta mohoni se ishim të mirë këtë sezon. Çdo javë. Për të fituar 18 ndeshje rresht, ju duhet të jeni mendërisht të fortë. Kjo është e rëndësishme për të ndërtuar klubin. Është e rëndësishme të besoni, sepse Manchester City nuk është si Manchester United, Chelsea apo Arsenal.

Ju i dini klubet e mëdha në Angli, që kanë një histori të madhe pas tyre. Ne duhet të përpiqemi të jemi më konsistentë sezonin e ardhshëm. Do të jetë më e ndërlikuar, por për klubin, lojtarët, të gjitha departamentet në klub, njerëzit mund të besojnë se jemi të mirë: Manchester City është një klub i mirë”.

Të gjitha të drejtat janë të rezervuara © 2019 - Gazeta Infopress