Kosova U18 në basketboll, kampione e divizionit C të Europës

22:08 / E diell, 29 Korrik 2018

Përfaqësuesja e Kosovës U-18 është shpallur kampion i Evropës në Divizionin C pas fitores historike ndaj Qipros (73-64) në finalen e madhe të kësaj gare.

 

Në duelin e zhvilluar në Pallatin e Rinisë dhe Sporteve, skuadra jonë ishte shumë bindëse në çerekun e parë (23:7).

Në dhjetëminutëshin e dytë shënimi i pikëve nuk kishte shumë dallim (16:13), mirëpo Kosova U-18 vazhdoi të ishte në epërsi të lartë (39-20).

Pas pushimit, qipriotët u kthyen në lojë duke shënuar tri pikë më shumë se basketbollistët tanë në çerekun e tretë (20:23), ndërsa ishin akoma më bindës në çerekun e fundit (14:21).

Megjithatë, ekipi Kosova U-18 arriti ta mbante epërsinë deri në fishkëllimën e fundit të gjyqtarit duke u shpallur kampion evropian në Divizionin C.

Basketbollistët e Përfaqësueses U-18 të Kosovës u kualifikuan në finalen e madhe, pasi të shtunën e mposhtën Irlandën në gjysmëfinale me rezultat 69-55.

Ndërkaq, në ndeshjen tjetër gjysmëfinale u takuan Qipro dhe Monako, ndërsa fitore regjistruan qipriotët me shifrat 76-64.

Qipro ishte ekipi që ia kishte shkaktuar Kosovës të vetmen humbje në këtë Kampionat Evropian dhe atë në fazën e grupeve.

Ndeshjen për vend të tretë, në mes Irlandës dhe Monakos, e fituan irlandezët me dy pikë epërsi (93-91).

Kampionati Evropian FIBA U-18, Divizioni C, ka filluar me 22 korrik dhe përfundoi me 29 korrik në Prishtinë me ceremoninë mbyllëse pas ndeshjes finale.

Skuadra kampione në Divizionin C që është Kosova U-18, nga viti 2019 do të bëjë gara në Divizionin B.

 

Të gjitha të drejtat janë të rezervuara © 2019 - Gazeta Infopress

Foto Lajm

Materialet dhe informacionet në këtë portal nuk mund të kopjohen, të shtypen, ose të përdoren për qëllime komerciale, pa miratimin e grupit medial. Çdo kopjim dhe publikim i paautorizuar paraqet shkelje të të drejtave të autorit dhe të pronës intelektuale dhe si i tillë sanksionohet me dispozitat ligjore në fuqi.

E-Mail: [email protected], Tel: +386 49 102 742, +377 44 587 400